تعال اڨدانا ، مرحبا وجلين بيك
غير تعال زورنا نفرحوا بيك..
حوشنا سڨيفة و أربعة ديار
وانت وين تبغي تبات خير و اختار
وسط حوش واسع تبهت و تدوخ
و حتى من المطبخ زمني بالشاروخ
و مخزن ضياف للاحباب و الاصحاب
و مطيبخة برانية و عشايش عالأجناب
الشرقية فيها مضواية علی الفسقية
يڨوللها جدودنا دار الثبوت
عدوك لا يبری لا يموت
أما الڨبلية دار بويا دار الحانوت
و الدنيا راهي زهر و بخوت
و البحرية الدار الجديدة
و الغربية دار جداي الصنديدة
و البير بجناحاته فوڨ التلة
و الساروط تجيبه الناس بكله
الجابية بالماء مليانه
و الزيتونة و النخلة و الرمانة
و العنبة و التوتة و التفاحة المزيانة
و ڨداش لعبت وسط الحوش و علی الدكانة
لا مرضت و لا جتني السخانة
إنْشِد علی الحوش و ايجا لمنزلنا
دائرة بيه طابية بالهندي منا و منا
جيب الجادة و المسرب و الثنية
و خش من الفلة الوسطانية ...
تڨصروا الوڨت و نعملوا السهرية ..
غير ايجا و طل و بات اڨدانا......
اتوا نحكيلك على زمان اللمة
و على هزان الحمل وڨت الزمة
و العينة كتف لكتف في كل مرمة
و على نغرة الراجل على أولاد عمه
ما تخافش خوك اللي ثمة ثمة...
ناس بكري ڨالوا اللي يحبنا يجينا..
و إذا ما زارنا يسأل علينا ...
هكة تعلمنا على اهلنا و امالينا..
و لا تبدلنا و لا ضيعنا خطاوينا..
و ربي يبقي الستر عليكم و علينا ...
Aucun commentaire:
Enregistrer un commentaire